पिंपरी: पावसाळ्यातील बदलत्या हवामानाच्या पार्श्वभूमीवर पिंपरी-चिंचवड शहरात स्वाईन फ्लू (H1N1) आणि फ्लूसदृश आजारांचा धोका लक्षात घेऊन पिंपरी-चिंचवड महानगरपालिकेच्या (PCMC) वैद्यकीय विभागाने नागरिकांसाठी आरोग्य मार्गदर्शक सूचना (Advisory) जारी केल्या आहेत. शहरात १ जानेवारी २०२६ पासून आतापर्यंत स्वाईन फ्लूचे १९ रुग्ण नोंदवले गेले आहेत. महापालिकेच्या सर्व रुग्णालयांमध्ये आणि दवाखान्यांमध्ये संशयित रुग्णांसाठी स्वतंत्र तपासणी कक्ष तसेच आवश्यक औषधसाठा सज्ज ठेवण्यात आला आहे. नागरिकांनी घाबरून न जाता प्रतिबंधात्मक उपाययोजना कराव्यात, असे आवाहन प्रशासनाने केले आहे.

हवामान बदलामुळे संसर्गाचा धोका

स्वाईन फ्लू हा श्वसनमार्गाशी संबंधित संसर्गजन्य आजार असून, इन्फ्लूएन्झा 'टाइप-ए' च्या एच१एन१ (H1N1) विषाणूमुळे त्याचा प्रसार होतो. हा विषाणू शरीरात गेल्यानंतर १ ते ७ दिवसांच्या कालावधीत लक्षणे दिसू लागतात. लहान मुले, वृद्ध नागरिक आणि मधुमेह, उच्च रक्तदाब अथवा श्वसनविकार असलेल्या सहव्याधीग्रस्तांमध्ये (High-risk category) संसर्गाची गुंतागुंत होण्याची शक्यता जास्त असते.

स्वाईन फ्लूची प्रमुख लक्षणे

सामान्य फ्लूप्रमाणेच लक्षणे असल्याने पुढील त्रासांकडे दुर्लक्ष करू नये:

  • १०२ ते १०३ अंशांपर्यंत तीव्र ताप आणि थंडी वाजणे
  • सतत खोकला, घसादुखी आणि कफ जमा होणे
  • तीव्र अंगदुखी, डोकेदुखी आणि असह्य थकवा जाणवणे
  • काही प्रकरणांमध्ये उलट्या किंवा जुलाबाचा त्रास होणे
  • श्वास घेण्यास अडचण निर्माण होणे

नागरिकांनी कोणती काळजी घ्यावी?

महापालिकेच्या वैद्यकीय विभागाने संसर्ग रोखण्यासाठी खालील प्रतिबंधात्मक नियमांचे पालन करण्याचे आवाहन केले आहे:

  • हात वारंवार धुवा: साबण आणि स्वच्छ पाण्याने हात धुवावेत अथवा सॅनिटायझरचा वापर करावा.
  • मास्कचा वापर: गर्दीच्या आणि सार्वजनिक ठिकाणी जाताना मास्क वापरावा; खोकताना किंवा शिंकताना रुमालाचा वापर करावा.
  • पोषक आहार व विश्रांती: शरीरातील प्रतिकारशक्ती वाढवण्यासाठी लिंबू, आवळा, मोसंबी, संत्री आणि हिरव्या पालेभाज्यांचा आहारात समावेश करावा तसेच पुरेसे पाणी प्यावे.
  • स्वतः औषधे घेणे टाळा: ताप किंवा सर्दी जाणवल्यास मेडिकलमधून स्वतःच्या मनाने औषधे न घेता थेट डॉक्टरांचा किंवा जवळच्या महापालिका दवाखान्यातील वैद्यकीय अधिकाऱ्यांचा सल्ला घ्यावा.

महापालिका रुग्णालयांत स्वतंत्र व्यवस्था

पिंपरी-चिंचवड महापालिकेने स्पष्ट केले आहे की, यशवंतराव चव्हाण स्मृती रुग्णालय (YCMH) सह सर्व क्षेत्रीय रुग्णालये व नागरी प्राथमिक आरोग्य केंद्रांमध्ये स्वाईन फ्लूच्या चाचण्या आणि उपचारांसाठी आवश्यक औषधोपचार मोफत व पुरेशा प्रमाणात उपलब्ध करण्यात आले आहेत.